சபாநாயகர் மரபை மறந்து வாக்கு சேகரிப்பா?

தலைமைத் தேர்தல் அதிகாரி ராஜினாமா செய்ய வேண்டும் என வலியுறுத்தி புதுச்சேரி முழுவதும் காங்கிரஸ் கட்சி சார்பில் தொடர் கண்டன ஆர்ப்பாட்டங்கள் நடைபெற்று வருகின்றன. அதன் ஒரு பகுதியாக ராஜ்பவன் தொகுதி சார்பில் மாவட்டத் தலைவர் வேல்முருகன் தலைமையில் கண்டன ஆர்ப்பாட்டம் நடைபெற்றது.

இதில் காங்கிரஸ் மாநிலத் தலைவர் வைத்திலிங்கம், முன்னாள் முதலமைச்சர் நாராயணசாமி, முன்னாள் காங்கிரஸ் சட்டமன்றக் கட்சித் தலைவர் வைத்தியநாதன், முன்னாள் அரசு கொறடா அனந்தராமன் உள்ளிட்டோர் கலந்து கொண்டு, தலைமைத் தேர்தல் அதிகாரி ராஜினாமா செய்ய வலியுறுத்தி கண்டன கோஷங்களை எழுப்பினர்.

ஆர்ப்பாட்டத்தில் பேசிய அனந்தராமன், புதுச்சேரியில் தேர்தல் துறையில் முறைகேடுகள் மூலம் ஆளும் கட்சி வெற்றி பெற்றதாகவும், தற்போது நடைபெறும் இடைத்தேர்தலிலும் அதிகாரத்தை பயன்படுத்தி ஆளும் தரப்பினர் செயல்படுவதாகவும் குற்றம்சாட்டினார்.

மேலும், தற்காலிக சபாநாயகர் முதலமைச்சரின் குரலாக செயல்படுவதாகவும், சபாநாயகர் பதவிக்கான மரபை மறந்து வாக்கு சேகரிப்பில் ஈடுபடுவதாகவும் அவர் விமர்சித்தார். சட்டத்தில் விதிமுறை உள்ளதா என்பதை விட, சபாநாயகர் பதவிக்குரிய மரபை மீறக்கூடாது என்பதே தங்களது நிலைப்பாடு என்றும் தெரிவித்தார்.

தொடர்ந்து, எவ்வளவு வாக்கு சேகரித்தாலும் அவருக்கு சபாநாயகர் பதவி வழங்கப்படாது என அனந்தராமன் பேசியது ஆர்ப்பாட்டத்தில் பரபரப்பை ஏற்படுத்தியது.