இந்தியாவில் ஐபோன் 18 விலை ஏன் அதிகம்?

ஆப்பிள் நிறுவனம் அறிமுகம் செய்துள்ள புதிய ஐபோன் 18 சீரிஸ் மாடல்களில் ஐபோன் 18 புரோ, ஐபோன் 18 புரோ மேக்ஸ் மற்றும் மடிக்கக்கூடிய ஐபோன் டுயோ ஆகியவை இடம்பெற்றுள்ளன.

இந்தியாவில் ஐபோன் டுயோவின் விலை ரூ.2.99 லட்சமாகவும், ஐபோன் 18 புரோ ரூ.1.65 லட்சமாகவும், ஐபோன் 18 புரோ மேக்ஸ் ரூ.1.79 லட்சமாகவும் நிர்ணயிக்கப்பட்டுள்ளது. இதே மாடல்கள் அமெரிக்கா உள்ளிட்ட பல நாடுகளில் இந்தியாவை விட குறைந்த விலையில் விற்பனை செய்யப்படுகின்றன.

இந்தியாவில் ஐபோன் டுயோவின் விலை அதிகமாக இருப்பதற்கு, அந்த சாதனம் முழுமையாக சீனாவில் இருந்து இறக்குமதி செய்யப்படுவது முக்கிய காரணமாக கூறப்படுகிறது. இதனுடன், கடந்த ஓராண்டில் அமெரிக்க டாலருக்கு நிகரான இந்திய ரூபாயின் மதிப்பு சுமார் 7 சதவீதம் சரிந்ததும் ஐபோன் 18 புரோ மற்றும் புரோ மேக்ஸ் விலை உயர்வுக்கு காரணமாகியுள்ளது.

மேலும், ஐபோன் உதிரிபாகங்களுக்கு விதிக்கப்படும் இறக்குமதி வரிகளும் இந்தியாவில் விலை அதிகரிக்க காரணமாக உள்ளன. இதனால் அமெரிக்கா உள்ளிட்ட நாடுகளுடன் ஒப்பிடும்போது இந்திய விலை உயர்வாக உள்ளது.

புதிய ஐபோன் மாடல்களுக்கு மட்டுமின்றி, ஏற்கனவே விற்பனையில் உள்ள பழைய மாடல்களின் விலையையும் ஆப்பிள் நிறுவனம் உயர்த்தியுள்ளது. செயற்கை நுண்ணறிவு நிறுவனங்களுக்கான சிப் தேவை உலக அளவில் அதிகரித்துள்ளதால், சிப்களின் விலையும் உயர்ந்துள்ளது. அதன் தாக்கம் பழைய ஐபோன் மாடல்களின் விலையிலும் எதிரொலித்துள்ளதாக துறை நிபுணர்கள் தெரிவிக்கின்றனர்.