இந்தியா - ஆப்கன் முதல் டி20 இன்று தொடக்கம்

இந்தியா - ஆப்கானிஸ்தான் அணிகள் இடையிலான 3 போட்டிகள் கொண்ட டி20 கிரிக்கெட் தொடர் இன்று டெல்லியில் தொடங்குகிறது. ஆப்கானிஸ்தான் நடத்தும் தொடராக இருந்தாலும், பாதுகாப்பு காரணங்களுக்காக மூன்று போட்டிகளும் டெல்லி அருண் ஜெட்லி மைதானத்தில் நடைபெறுகின்றன. வெளிநாட்டு அணி ஒன்று இந்தியாவை சொந்த மண்ணாக ஏற்று, இந்திய அணியை எதிர்கொள்வது இதுவே முதல்முறை எனக் கூறப்படுகிறது.

ஸ்ரேயஸ் ஐயர் தலைமையில் இந்திய அணி களமிறங்குகிறது. ஆப்கானிஸ்தான் அணிக்கு இப்ராஹிம் சத்ரான் முதல்முறையாக முழுநேர டி20 கேப்டனாக பொறுப்பேற்றுள்ளார்.

இந்திய அணியில் சூரியவன்ஷி, அபிஷேக் சர்மா, சஞ்சு சாம்சன், இஷான் கிஷன், ஜஸ்பிரித் பும்ரா உள்ளிட்ட வீரர்கள் இடம்பெற்றுள்ளனர். குறிப்பாக, தொடக்க வீரர்களாக யார் களமிறங்குவார்கள் என்ற எதிர்பார்ப்பு அதிகரித்துள்ளது.

அபிஷேக் சர்மாவுடன் சஞ்சு சாம்சன் இணைந்து தொடங்கிய போட்டிகளில் நல்ல முடிவுகள் கிடைத்துள்ள நிலையில், இளம் வீரர் வைபவ் சூரியவன்ஷிக்கும் வாய்ப்பு வழங்கப்படுமா என்ற கேள்வி எழுந்துள்ளது. வலைப்பயிற்சியில் பும்ராவின் வேகப்பந்துகளை எதிர்கொள்வதில் சூரியவன்ஷி சற்று சிரமப்பட்டதாகவும், சஞ்சு சாம்சன் அவற்றை நேர்த்தியாக கையாண்டதாகவும் கூறப்படுகிறது.

அதேநேரத்தில், ஆப்கானிஸ்தான் பந்துவீச்சை எதிர்கொள்ள சூரியவன்ஷியின் அதிரடி ஆட்டம் பயனுள்ளதாக இருக்கும் எனவும் எதிர்பார்க்கப்படுகிறது. இஷான் கிஷனுக்கு வலைப்பயிற்சியின்போது முதுகில் காயம் ஏற்பட்டதாகத் தெரிகிறது. அவர் விளையாட முடியாத சூழல் ஏற்பட்டால், சஞ்சு சாம்சன் மற்றும் சூரியவன்ஷி இருவருக்கும் ஆடும் லெவனில் இடம் கிடைக்க வாய்ப்புள்ளது.

இந்திய அணியில் அக்சர் படேல், வாஷிங்டன் சுந்தர் ஆகிய ஆல்ரவுண்டர்கள் இடம்பெறுவது உறுதி என எதிர்பார்க்கப்படுகிறது. மூன்றாவது சுழற்பந்து வீச்சாளராக வருண் சக்கரவர்த்தியா அல்லது வேகப்பந்து வீச்சாளர் யாஷ் தாகூரா என்பது எதிர்பார்ப்பை ஏற்படுத்தியுள்ளது. பும்ரா, அர்ஷ்தீப் சிங் மற்றும் நிதிஷ் குமார் ரெட்டி ஆகியோரும் முக்கியத் தேர்வுகளாக உள்ளனர்.

ஆப்கானிஸ்தான் அணியில் ரஷித் கான், முகமது நபி, ரஹ்மானுல்லா குர்பாஸ், நூர் அகமது உள்ளிட்ட அனுபவமிக்க வீரர்கள் உள்ளனர். காயத்திலிருந்து திரும்பிய நவீன் உல் ஹக் மீதும் கவனம் குவிந்துள்ளது. ரஷித் கான், நூர் அகமது உள்ளிட்ட ஆப்கன் சுழற்பந்து வீச்சாளர்களை எதிர்கொள்வது இந்திய அணிக்கு முக்கிய சவாலாக இருக்கும்.

இந்நிலையில், டெல்லி அருண் ஜெட்லி மைதானத்தின் ஆடுகளம் பந்துவீச்சாளர்களுக்கு சாதகமாக இருக்கும் என எதிர்பார்க்கப்படுகிறது. இந்தியா - ஆப்கானிஸ்தான் முதல் டி20 போட்டி இன்று இரவு 7 மணிக்கு தொடங்குகிறது. ஆப்கானிஸ்தானுக்கு எதிரான கடைசி 9 டி20 போட்டிகளில் இந்தியா 8 வெற்றிகளைப் பெற்றுள்ளது குறிப்பிடத்தக்கது.