ஆசிய விளையாட்டில் இந்தியாவுக்கு முதல் பதக்கம்

ஜப்பானின் அய்ச்சி-நகோயாவில் 20வது ஆசிய விளையாட்டு போட்டிகள் செப்டம்பர் 19 முதல் அக்டோபர் 4-ம் தேதி வரை நடைபெற்று வருகின்றன. இதில் 45 நாடுகளை சேர்ந்த சுமார் 11 ஆயிரம் வீரர், வீராங்கனைகள் பங்கேற்கின்றனர்.

இந்தியா சார்பில் 35 விளையாட்டுப் பிரிவுகளில் 501 பேர் களமிறங்கியுள்ளனர். இதில் 267 வீரர்களும், 234 வீராங்கனைகளும் இடம்பெற்றுள்ளனர்.

ஆசிய விளையாட்டுப் போட்டிகளின் தொடக்க விழா நகோயாவில் உள்ள மிசுஹா பார்க் அத்லெட்டிக் மைதானத்தில் நடைபெற்றது. சுமார் 2 மணி நேரம் நடைபெற்ற தொடக்க விழாவை 30 ஆயிரம் ரசிகர்கள் நேரில் கண்டுகளித்தனர். ஜப்பான் மன்னர் நருஹிட்டோ போட்டிகளை முறைப்படி தொடங்கி வைத்தார்.

தொடக்க விழா அணிவகுப்பில் இந்திய அணியின் சார்பில் துப்பாக்கிச் சுடுதல் வீராங்கனை மனு பாகர் மற்றும் கபடி வீரர் பவன் ஷெராவத் ஆகியோர் இந்திய மூவர்ணக் கொடியை ஏந்திச் சென்றனர்.

இந்நிலையில், இந்தியாவுக்கு முதல் பதக்கம் கிடைத்துள்ளது. பெண்களுக்கான 10 மீட்டர் ஏர் ரைபிள் அணிப் பிரிவில் இளவேனில் வாலறிவன், விதர்ஷா வினோத் மற்றும் சோனம் மஸ்கர் ஆகியோர் அடங்கிய இந்திய அணி வெள்ளிப் பதக்கம் வென்று அசத்தியுள்ளது.