விநாயகர் சதுர்த்தியால் ஆம்னி பஸ் கட்டணம் உயர்வு

விநாயகர் சதுர்த்தி பண்டிகை மற்றும் தொடர் விடுமுறை காரணமாக, சென்னையில் இருந்து தமிழ்நாட்டின் பல்வேறு பகுதிகளுக்குச் செல்லும் ஆம்னி பேருந்துகளின் கட்டணம் திடீரென அதிகரித்துள்ளது.

திங்கட்கிழமை விநாயகர் சதுர்த்தி கொண்டாடப்பட உள்ள நிலையில், தொடர்ந்து விடுமுறை நாட்கள் வருவதால் சென்னையில் வசிக்கும் பொதுமக்கள் பலரும் தங்களது சொந்த ஊர்களுக்குச் செல்ல திட்டமிட்டுள்ளனர். இதனால் ஆம்னி பேருந்துகளுக்கான முன்பதிவும் அதிகரித்துள்ளது.

பயணிகளின் தேவையை கருத்தில் கொண்டு ஆம்னி பேருந்துகளின் கட்டணம் வழக்கத்தை விட பல மடங்கு உயர்த்தப்பட்டுள்ளதாக கூறப்படுகிறது.

குறிப்பாக, சென்னையில் இருந்து மதுரை செல்லும் ஆம்னி பேருந்துகளின் கட்டணம் சாதாரண நாட்களில் ரூ.700 முதல் ரூ.1,800 வரை இருக்கும் நிலையில், தற்போது பயணக் கட்டணம் ரூ.5,000 வரை உயர்ந்துள்ளது.

தொடர் விடுமுறை காலத்தில் சொந்த ஊர்களுக்குச் செல்லும் பயணிகளுக்கு இந்த கட்டண உயர்வு கூடுதல் சுமையை ஏற்படுத்தியுள்ளது.