மேற்குவங்க முன்னாள் முதலமைச்சரும் திரிணாமுல் காங்கிரஸ் தலைவருமான மம்தா பானர்ஜியை திமுக துணைப் பொதுச்செயலாளரும் மக்களவை உறுப்பினருமான கனிமொழி கொல்கத்தாவில் சந்தித்ததாக தகவல் வெளியாகியுள்ளது.
செப்டம்பர் 17ஆம் தேதி தெற்கு கொல்கத்தாவின் காளிகாட்டில் உள்ள மம்தா பானர்ஜியின் இல்லத்தில் இந்த சந்திப்பு நடைபெற்றதாக தெரிவிக்கப்பட்டுள்ளது. இருவரும் பல்வேறு விவகாரங்கள் குறித்து பேசியதாக கூறப்பட்டாலும், சந்திப்பில் விவாதிக்கப்பட்ட விஷயங்கள் குறித்த அதிகாரப்பூர்வ தகவல்கள் வெளியாகவில்லை.
இதற்கு சில நாட்களுக்கு முன்பு மும்பையில் சிவசேனா (உத்தவ் பாலாசாகேப் தாக்கரே) தலைவர் உத்தவ் தாக்கரேவையும், பின்னர் தேசியவாத காங்கிரஸ் கட்சி (சரத் சந்திர பவார்) தலைவர் சரத் பவார் மற்றும் அவரது மகள் சுப்ரியா சுலே ஆகியோரையும் கனிமொழி சந்தித்ததாக செய்திகள் வெளியாகின.
உத்தவ் தாக்கரே உடனான சந்திப்பில் தொகுதி மறுவரையறை உள்ளிட்ட விவகாரங்கள் குறித்து பேசப்பட்டதாக தகவல்கள் வெளியாகியிருந்தன. பிராந்திய கட்சித் தலைவர்களுடனான கனிமொழியின் தொடர்ச்சியான சந்திப்புகள் தற்போது அரசியல் வட்டாரத்தில் கவனம் பெற்றுள்ளன.
தமிழ்நாட்டில் திமுக–காங்கிரஸ் உறவில் ஏற்பட்டுள்ள மாற்றங்கள் மற்றும் தேசிய அளவில் எதிர்க்கட்சிகளிடையே நிலவும் கருத்து வேறுபாடுகளுக்கு மத்தியில், இந்த தொடர் சந்திப்புகள் முக்கியத்துவம் பெற்றுள்ளன.
கனிமொழியின் மம்தா பானர்ஜி சந்திப்பு 2029 மக்களவைத் தேர்தலை முன்னிட்டு பிராந்திய கட்சிகளை உள்ளடக்கிய புதிய அரசியல் அணிக்கான முயற்சியா என்ற கேள்வியையும் எழுப்பியுள்ளது. எனினும், புதிய கூட்டணி அல்லது மூன்றாவது அணி அமைப்பது தொடர்பாக இதுவரை எந்த அதிகாரப்பூர்வ அறிவிப்பும் வெளியாகவில்லை; இது தற்போது அரசியல் வட்டாரத்தில் நிலவும் ஊகமாகவே உள்ளது.
மம்தாவை சந்தித்த கனிமொழி: அரசியல் பரபரப்பு
கருத்துகள் (0)
முதல் கருத்தை பதிவு செய்யுங்கள்.