சட்டசபையில் முதல்வர் விஜய், தி.மு.க. தலைவர் ஸ்டாலின் மிசா வழக்கில் கைது செய்யப்பட்ட விவகாரம் குறித்து பேசியதற்கும், அவர் செய்த சைகைக்கும் எதிர்ப்பு தெரிவித்து தி.மு.க.வினர் பல்வேறு இடங்களில் கண்டன ஆர்ப்பாட்டங்களில் ஈடுபட்டு வருகின்றனர்.
இதன் ஒரு பகுதியாக சைதாப்பேட்டையில் நடைபெற்ற ஆர்ப்பாட்டத்தில், முதல்வர் விஜயை ஒருமையில் விமர்சித்ததுடன், அமைச்சர் நிர்மல் குமார் குறித்தும் தி.மு.க. எம்.பி. ராஜா தரக்குறைவான கருத்துகளை தெரிவித்ததாக கூறப்படுகிறது.
இதற்கு கண்டனம் தெரிவித்த அமைச்சர் நிர்மல் குமார் வெளியிட்டுள்ள அறிக்கையில், ஆர்ப்பாட்டம் என்ற பெயரில் தி.மு.க.வினர் நடத்தியதாக கூறப்படும் ஆபாசமான பேச்சுகள் பெண்களிடையே அதிர்ச்சியை ஏற்படுத்தியுள்ளதாக தெரிவித்துள்ளார்.
ஊழல், துரோகம், பொய் குறித்து கேள்வி எழுப்பும்போது வன்முறை அல்லது ஆபாசமான வார்த்தைகளை பயன்படுத்துவதே தி.மு.க.வின் பதிலாக இருப்பதாக அவர் குற்றம்சாட்டியுள்ளார். தன்னையும் முதல்வரையும் ஆபாசமாக பேச வைப்பதுதான் தி.மு.க.வின் கடைசி ஆயுதமா என்றும் கேள்வி எழுப்பியுள்ளார்.
மேலும், தி.மு.க.வினர் பேசிய தரக்குறைவான வார்த்தைகளை அவர்களது குடும்பத்தினர், குறிப்பாக பெண்கள் மற்றும் குழந்தைகளிடம் காட்ட முடியுமா என ஸ்டாலின் விளக்க வேண்டும் என்றும் அமைச்சர் தெரிவித்துள்ளார்.
அரசியலில் ஒவ்வொரு செயல்பாடும் மக்களால் கவனிக்கப்பட்டு மதிப்பிடப்படுகிறது என்பதை ஸ்டாலின் உணர வேண்டும் எனக் குறிப்பிட்ட அவர், தி.மு.க.வின் செயல்பாடுகளை நேர்மையாக எதிர்கொள்வோம் என்றும் தெரிவித்துள்ளார்.
தமிழக அரசியல் களத்தில் தி.மு.க.வின் முடிவுரையை மக்கள் விரைவில் எழுதுவார்கள் என்றும் அமைச்சர் நிர்மல் குமார் தனது அறிக்கையில் தெரிவித்துள்ளார்.
தி.மு.க. ஆபாச அரசியல்: அமைச்சர் நிர்மல் குமார் கண்டனம்
கருத்துகள் (0)
முதல் கருத்தை பதிவு செய்யுங்கள்.