விநாயகர் சதுர்த்தி விழாவையொட்டி தமிழகம் முழுவதும் பொது இடங்களில் விநாயகர் சிலைகளை வைத்து வழிபாடு நடத்தவும், பின்னர் ஊர்வலமாக எடுத்துச் சென்று நீர்நிலைகளில் கரைக்கவும் பொதுமக்கள் மற்றும் இந்து அமைப்பினர் போலீசாரிடம் அனுமதி கோரியிருந்தனர்.
உயர் நீதிமன்ற உத்தரவு, மாசு கட்டுப்பாட்டு வாரியத்தின் அறிவுறுத்தல்கள், தீயணைப்பு மற்றும் உள்ளாட்சி அமைப்புகளின் தடையில்லா சான்றுகள் மற்றும் காவல்துறையின் கட்டுப்பாடுகளை பின்பற்றி, தமிழகம் முழுவதும் சுமார் 36 ஆயிரம் விநாயகர் சிலைகளை பொது இடங்களில் நிறுவ போலீசார் அனுமதி வழங்கியுள்ளனர்.
சென்னை காவல் எல்லைக்குள் மட்டும் 1,562 விநாயகர் சிலைகளை நிறுவ அனுமதி அளிக்கப்பட்டுள்ளது. இதையொட்டி 16,500 போலீசார் மற்றும் 500 ஊர்க்காவல் படையினர் பாதுகாப்புப் பணியில் ஈடுபடுத்தப்பட உள்ளனர்.
சிலைகள் நிறுவப்படும் இடங்களில் சிசிடிவி கேமராக்களை பொருத்துவதுடன், தன்னார்வலர்களை பாதுகாப்புப் பணியில் ஈடுபடுத்தவும் சிலை அமைப்பாளர்களுக்கு அறிவுறுத்தப்பட்டுள்ளது.
மேலும், காவல்துறை அனுமதித்த வழித்தடங்களில் செப்டம்பர் 19 மற்றும் 20-ம் தேதிகளில் விநாயகர் சிலைகளை ஊர்வலமாக எடுத்துச் சென்று, குறிப்பிட்ட நீர்நிலைகளில் கரைக்க வேண்டும் என தெரிவிக்கப்பட்டுள்ளது.
அனுமதி பெறாத இடங்களில் சிலைகளை நிறுவக்கூடாது என்றும், விதிமுறைகளை மீறுவோர் மற்றும் பொது அமைதிக்கு பாதிப்பு ஏற்படுத்த முயற்சிப்போர் மீது சட்டப்படி நடவடிக்கை எடுக்கப்படும் என்றும் காவல்துறை எச்சரித்துள்ளது.
தமிழகத்தில் 36 ஆயிரம் விநாயகர் சிலைகளுக்கு அனுமதி
கருத்துகள் (0)
முதல் கருத்தை பதிவு செய்யுங்கள்.