இனி மின் கட்டணத்துடன் போக்குவரத்து அபராதமா?

நாடு முழுவதும் போக்குவரத்து விதிகளை மீறும் வாகன ஓட்டிகளுக்கு இ-சலான் முறையில் அபராதம் விதிக்கப்பட்டு வருகிறது. ஆனால், அவற்றில் பெருமளவிலான தொகை இன்னும் வசூலிக்கப்படாமல் இருப்பதாக உச்ச நீதிமன்றத்தில் தெரிவிக்கப்பட்டுள்ளது.

இது தொடர்பான வழக்கு உச்ச நீதிமன்ற நீதிபதிகள் ஜே.பி.பர்திவாலா மற்றும் கே.வி.விஸ்வநாதன் அடங்கிய அமர்வு முன்பு செப்டம்பர் 28-ஆம் தேதி விசாரணைக்கு வந்தது. அப்போது, போக்குவரத்து அபராதங்களை விதிப்பது மட்டுமின்றி, அவற்றை முறையாக வசூலிப்பதற்கான நடவடிக்கைகளும் அவசியம் என நீதிபதிகள் தெரிவித்தனர்.

நாடு முழுவதும் சுமார் ரூ.20,000 கோடி அளவிலான போக்குவரத்து அபராதங்கள் நிலுவையில் இருப்பதாக நீதிமன்றத்தில் தெரிவிக்கப்பட்டது. மேலும், மாநிலங்கள் மற்றும் யூனியன் பிரதேசங்களில் மொத்தமாக ரூ.45,000 கோடி அளவிலான இ-சலான் தொகை வசூலிக்க வேண்டிய நிலையில், சுமார் ரூ.25,000 கோடி வசூலிக்கப்பட்டுள்ளதாகவும் தகவல் தெரிவிக்கப்பட்டது.

செலுத்தப்படாத போக்குவரத்து அபராதங்களை மின் கட்டணத்துடன் இணைத்து வசூலிப்பது குறித்து மத்திய, மாநில அரசுகள் பரிசீலிக்கலாம் என நீதிபதிகள் ஆலோசனை தெரிவித்தனர். இதுதவிர, நிலுவையில் உள்ள இ-சலான்களுடன் தொடர்புடைய வாகனங்களை பரிவாஹன் தளத்தில் குறியிடுவது, வாகன உரிமை மாற்றம் உள்ளிட்ட சில சேவைகளில் கட்டுப்பாடுகளை விதிப்பது, சீரற்ற வாகன சோதனைகளை மேற்கொள்வது போன்ற வழிமுறைகளையும் நீதிமன்றம் பரிசீலனைக்கு முன்வைத்துள்ளது.

இந்த நடவடிக்கைகள் குறித்து மத்திய மற்றும் மாநில அரசுகள் நடைமுறைப்படுத்தக்கூடிய வழிமுறைகளை உருவாக்க வேண்டும் என்பதே விசாரணையின் முக்கிய அம்சமாக உள்ளது.